政情：今日你上鏡：承傳媽咪「有衣食」 黃錦星着二手衫
環境局局長黃錦星係香港推動環保嘅重要官員，原來佢嘅環保意識係從小開始培養得嚟嘅。佢尋日喺Facebook貼咗一張小時候影嘅相，話佢細細個就已着由親戚畀嘅二手衫，仲大讚係靚衫嚟添！原來黃錦星媽咪自小就教佢做人要「有衣食」，所以佢咪好珍惜啲衣物囉！
將環保意識傳畀個女
「衣」就有喇，咁「食」呢？黃錦星話媽咪係「惜食先鋒」，經常將「粒粒皆辛苦」、「咪眼闊肚窄」掛喺口邊，令佢一早已有珍惜糧食嘅習慣，所以趁住尋日係母親節，感謝佢媽咪咁話，佢仲明言會將呢份環保意識傳畀個女添！
