本港土地房屋短缺，粉嶺高爾夫球場被指可以用作興建房屋，建制派態度亦似有變數，除咗一直支持用該幅用地起樓嘅工聯會之外，民建聯最近口風亦更為鬆動，直指粉嶺高球場係其中一個選項。唔知高球場塊地係咪凍過水呢？
工聯會立法會議員麥美娟話一直認為可以發展粉嶺高爾夫球場，建議先將高球場重置喺不能建屋嘅將軍澳堆填區復修用地，而粉嶺高球場現址就用嚟起樓，重申不應排除任何能增加土地房屋供應嘅方法，包括發展粉嶺高球場用地。
身兼北區區議員嘅民建聯立法會議員劉國勳話，一直對用粉嶺高球場起樓持開放態度，冇剔出選項以外，但最重要係先做好交通評估，因為北區本身已有交通問題。而民建聯主席李慧琼就講得更鬆動，佢話應以開發面積較大、對持份者影響較細嘅土地作為優先選項，粉嶺高爾夫球場係其中一個選項，但需要解決交通問題及其他持份者嘅憂慮，亦應考慮填海、使用棕地、公私營合作等方式，先有機會改善現時供應不足嘅情況。兩大建制政黨都冇企硬撐保留粉嶺高球場，睇怕高球場都真係危危乎喎。