中環出更：轟「樂‧大埔」廢App 劉勇威促撤撥款
近年政府開發不少手機應用程式（App），讓市民可配合智能手機使用。除咗一般政府部門的App，多個區議會亦有贊助App，並提供區內食肆同景點讓市民參考。當中大埔區議會曾花十八萬元開發「樂‧大埔」嘅手機App，其後每年須付四萬元作維護費用，而今年亦增加撥款至十萬元。大埔區議員劉勇威批評「樂‧大埔」的資料過時，表現未如理想，認為區議會應撤回撥款，更建議以網頁形式作推廣。
列39食肆 17間已結業
劉勇威指「樂‧大埔」開發多年，但只有約六千下載人次，認為使用人次較低，而且資料過時。佢舉例，程式中列出位於大埔舊墟嘅食肆有三十九間，但當中有十七間已結業，亦有部分食肆嘅資料錯漏百出，例如食肆名稱有錯、兩間食肆嘅地址相同等。佢話兩年前曾喺區議會上提出問題，但喺舊年年初，區議會相關工作小組則認為當時「樂‧大埔」剛完成資料更新，認為不宜立即把該App下架，但過去兩年已給予充分時間讓該App作出改善，但成效未符合要求。
喺日前大埔區議會嘅漁農工商、旅遊及文娛康體委員會會議上，劉勇威聯同多名民主派議員提交聯署信件，希望區議會跟進事件，有份聯署嘅議員任萬全就質疑該App嘅資金運用係咪達到效果，建議參考外國旅遊局嘅形式作宣傳，但委員會轄下嘅推廣及宣傳工作小組主席、民建聯大埔區議員譚榮勳認為該App仍在運作，建議應先搜集資料後再作討論。相關議案將喺工作小組再作討論，但實際開會日期未定。
卓妮