中環出更：買衫要一款多色 吳永嘉底褲都熨埋
俗語有話「先敬羅衣後敬人」，可見衣着打扮喺社交上非常重要，好似立法會工業界議員吳永嘉（Jimmy）就出名姿整喇！佢唔單止買衫時經常一款多色，除咗黃色較少外，其他乜嘢顏色都有，而且有逾百條呔備用，話容易襯衫喎。淨係襯都唔夠嘅，Jimmy仲要求乾淨企理，啲衫洗完就一定會熨，仲話唔單止熨衫同褲，連襪甚至係底褲都會熨！除咗衣物，佢屋企其他用品都放得非常之整齊乾淨，搞到有啲朋友成日笑佢有強迫症！
梁美芬着唔到太高踭嘅鞋
經民聯嘅議員梁美芬啲衫都好多顏色，當中比較鍾意黑、白、粉紅色，而黃、紅、淺綠等亦間中會買，佢話自己接受到好多唔同款式嘅配搭，所以都買唔少衣物，特別係鞋，但佢話依家着唔到太高嘅高踭鞋，通常都只係着一吋半，再高啲嘅就只係擺。買咁多，屋企夠唔夠位放o架？佢就笑笑口話地方始終係有限，所以每兩至三年都會送一啲舊衫畀慈善機構，唔好浪費嘛！
唔好以為所有議員都咁姿整，熱血公民嘅議員鄭松泰就成日畀人問：「係咪冇衫着啊你？」原來鄭松泰比較鍾意藍色，好多時都係一色多款，所以啲人以為佢日日都着同一件衫，其實只係啲款差別比較細，同埋係同一隻色，所以先有咁嘅誤會啫！
旅遊界議員姚思榮、金融界議員陳振英成日着西裝，而佢哋無論係造衫定買衫，都盡量一次過造或者買幾件，而原因竟然都係因為懶得試身。姚思榮話試身麻煩，仲成日要搵人幫眼先夠信心，所以盡量一次買多啲；陳振英就話有啲試身室燈光會照到好熱，試得嚟都成身汗，特別係佢嘅西裝全部都係度身訂造，如果搞得耐會好麻煩，梗係度一次造幾套最划算啦！
卓妮