政情：實測食署洗地機 袁海文讚掂
食環署一向都係用高壓水槍清洗街道，但水花四濺成日噴到途人，兼且能夠集中流到嘅範圍唔大，要花時間去洗一條街。深水埗區議員袁海文（Ramon）同鄒穎恒日前一齊落區，實測食環最新設施「高速、高溫、高壓洗地機」，全個深水埗區限定只有一部，Ramon試完都大讚「掂」，希望全港都可以加快引入洗地機。
盼全港盡快轉用
Ramon喺社交網站上載短片，見佢着到斯斯文文、恤衫西褲咁，攞住部洗地機真係唔多夾。但佢好似好輕易就推得郁，仲有好多黑過墨汁嘅污水流出，洗過嘅地都立即變白，得咗！
之後同Ramon傾番，佢話呢部機喺上月底已經引入，知道好多區都會陸續用，嗰日試完覺得好方便，又洗得好乾淨，仲冇水花濺到條褲，希望全香港都可以盡快轉用。佢又話呢部機其實好平，僅約數千蚊，只係要用另一款水車可能貴少少，但整體都係對社區好嘅。