政情：呻監獄飯難食 黃浩銘話只夠吊命
社民連副主席黃浩銘近年官司纏身，早排因為佔旺藐視法庭案入獄，上月中啱啱刑滿同另一宗案獲准保釋可以暫時出獄。回復「自由身」兩個多星期嘅佢，尋日出席一個節目時就呻，監獄膳食「麻麻地」，最多只係「吊住你條命唔死囉」，但太平紳士兼立法會前議員劉慧卿就話唔係，次次食親都「幾好味喎」。
黃浩銘話監獄並唔係好似電影《監獄風雲》咁樣，喺佢眼皮下未見有職員打人，但衣食住就唔係好好，只係「唔會畀你死」。而卿姐就話最近去過赤柱監獄，在囚人士啲膳食有營養師跟。黃浩銘即刻話「專登整嘅」，卿姐無奈話可能係，反映過問題都冇辦法。
有意搞聯盟或合併
另外，卿姐又話社民連冇議員代表將來點搞好？黃浩銘承認係艱難，強調冇議席只係因為梁國雄（長毛）被取消資格（DQ）。對於係咪可以同其他黨「走埋一齊」，黃浩銘話要具體傾，睇吓要搞聯盟定合併，佢個人對呢個方向係同意，兼且係樂見其成，佢又舉例，一六年社民連同人民力量組成政治聯盟，「我哋行得好近」，係踏出咗第一步。問到係咪有傾過合併，佢就話管理層內冇，不過要時間去處理細節，始終有黨員覺得目前狀況好好。