政情：被停主席職務 張星煒嗌無辜
去年爆出大批會員被取消資訊科技（IT）界選民資格嘅電機暨電子工程師學會（IEEE）香港分會，據悉有大量被「DQ」（取消資格）嘅會員不滿，於是向分會嘅母會IEEE亞太區分會（Region 10）投訴，結果主席張星煒上星期六被停職，而佢接受查詢時就高呼無辜。
稱同會員失選民資格無關
張星煒話Region 10並未向佢交代停職嘅原因，佢否認事件同去年大批會員嘅選民資格被「DQ」有關，解釋指去年收到選舉事務處要求核對選民資料，但佢就話所有嘅會員資料，好似身份證號碼咁，都係由IEEE嘅美國總部持有，香港乜嘢個人資料都冇，所以佢已將有關要求同時限等轉交總部，但直至限期屆滿，總部都未有處理，亦未有交代理由。
「選民資格單嘢唔關我事，好無辜！」張星煒指事後已透過內部通訊向會員解釋事件，唔認為會員作出相關指控。佢又批評Region 10嘅帳目混亂，指自己上任後，銀行戶口同會計紀錄都有大量文件唔見，導致未能夠順利交接。