政情：鄧家彪網戰捉蟲 益晒范國威
三月嘅立法會補選選舉開支陸續「出爐」，唔少候選人愈嚟愈「離地」改攻網絡戰，喺多個社交媒體大灑金錢落廣告。就好似喺年半內兩度失落新界東議席嘅工聯會前立法會議員鄧家彪（阿彪），竟然用錢「投資」落對手、已當選嘅新同盟立法會議員范國威（Gary）身上，想借機話Gary欠前職員一個道歉，點知瀏覽人次仲高過佢介紹自己專頁喎！今鋪可能變相幫Gary增加曝光率，認真「捉蟲」。
唱衰反增對手曝光率
根據阿彪嘅申報，佢單係推銷自己專頁就花費約二萬二千元，換得近三萬次瀏覽，目前仲有一萬九千人有Like。佢另外使咗六千二百多元去推廣一個題為「鄧家彪為打工仔出頭 指出范國威仍欠舊同事一個道歉」嘅貼文。雖然使錢少，但就換嚟八萬三千次瀏覽，當一次為一個人嚟計，即係有八萬多人從而認識Gary。
網絡戰早成為潮流新趨勢，阿彪以為推廣對手負面貼文就有着數，但就好似忘記有留言同分享任網民無限發展。本來係用嚟唱衰Gary，反而增加咗佢嘅曝光率，唔知Gary勝出補選重返立法會，係咪多得阿彪送佢一程？
然而阿彪整個選舉期非常「揼本」，使咗約二百二十四萬元，但同時獲得工聯政務發展基金全數捐款埋單，加上最後政府又會有約一半資助，實際要掏荷包都係約一百一十萬多元。而按佢獲得約十五萬票計算，每票開支約為十四元七毫。
當中整筆宣傳費高達二百萬元，包括喺四條隧道落廣告花近三十萬元，其中獅子山隧道最貴，要十一萬元。而喺選舉當日就有一千零二十五人幫手助選，食飯都使二萬元，買水又用咗五千二百多元。
另外，建築界議員謝偉銓（Tony）嘅選舉開支花約三十七萬元，而捐款都收咗三十八萬元，所以佢已將餘款捐咗畀無國界醫生。按Tony獲得二千九百二十九票，每票值一百二十六元七毫。佢亦同樣集中火力打網戰，使四萬六千元喺社交網站發貼。