中環出更：鄭松泰驚被DQ 去信泛民求救
熱血公民嘅立法會議員鄭松泰喺前年十月倒插五星旗同區旗事件，立法會最快下周三（16日）恢復辯論由獨立謝偉俊根據《議事規則》第四十九B（1A）條動議譴責鄭松泰嘅議案，若然有在席三分之二議員支持譴責動議，鄭松泰將會被DQ，即喪失立法會議員資格。正所謂唔怕一萬，最怕萬一，鄭松泰似乎都聞到燶味，除咗立法會主席梁君彥之外，佢月初就去信全體議員，包括二十多名泛民議員疑拉票「救亡」。
希望議員出席投票
鄭松泰喺信中自稱「本席」，又認為前年十月十九日嘅會議中有否行為不檢，係咪合乎擔任立法會議員資格，只能由選民決定，議會唔應該剝奪選民決定權；佢又懇請議員屆時能夠出席會議並且投票，保護選民嘅政治權利。
眾所周知，建制派支持譴責鄭松泰議案，幾乎係冇懸念，換言之最少有四十一名建制派支持譴責議案，距離在席三分之二支持嘅通過門檻，即四十六名議員，尚欠五人，若然有五名泛民投票支持，或是部分議員不在席，鄭松泰都有被DQ嘅風險，故明眼人都睇得出，鄭松泰呢封信嘅對象係泛民議員為主，唔知泛民議員最終聽唔聽得入耳呢？
卓妮