中環出更：愛心飯團派出火 黃國權冀磨練港青
香港青少年成日被批評抗逆力低，亦欠缺關懷社會同感恩嘅心。慈善機構愛心飯團創辦人黃國權（Danny）都有好深感受，事關佢同兩間深水埗區內中學合作，每星期搵學生到校門口幫手派飯畀基層街坊，初初唔少學生既懶散又冇心機，後來慢慢受到感染而改變態度。呢個經歷激發咗佢心中嗰團火，打算搵多幾間學校合作，實行一邊做善事，一邊磨練港青。
身兼香港汽車服務業聯會永遠榮譽會長嘅Danny喺深水埗有間車行，經常見到為餬口而吃力推回收車仔嘅公公婆婆身影，所以四年前開始喺公司門口派飯，現時每星期大約派一千個暖飯及其他物資。由於派飯令佢目睹受助嘅街坊亦樂於助人嘅感人故事，加上愈嚟愈多好友支持同捐助，於是最近就註冊成為慈善團體，並決定喺十月籌辦一場慈善晚宴，籌集善款做大佢。
嚴偉貞話搵埋弱能學生參與
呢日Danny約埋一班愛心飯團核心成員飯敍，討論慈善晚宴嘅安排，包括永遠榮譽會長兼晚宴籌委會主席李文偉同太太嚴偉貞、財務總監利僑峰同右軚汽車商會會長陳晧民等。嚴偉貞都好贊同搵多啲學生做義工，仲建議可以搵弱能學校嘅學生參與，令佢哋都有機會體驗助人之樂。Danny都讚好，形容係「雙贏」添！
李文偉最近經常為慈善機構做籌款搞手，佢話因為細個屋企窮，食唔飽，書都讀唔成，年紀細細就要幫爸爸推木頭車做走鬼生意。諗起當年咁辛苦，今日有能力梗要回饋社會。
卓妮