政情：離開政府10個月 趙必立返新工
今屆政府已經運作十個月，未有連任嘅政治委任官員喺離職後都陸續各有發展，好似財經事務及庫務局前局長陳家強同環境局前副局長陸恭蕙都已經再執教，而最新就輪到財經事務及庫務局前政治助理趙必立，佢將會從事研究有關金融科技嘅政策工作喇！
研究金融科技政策
前任行政長官及政治委任官員離職後工作諮詢委員會（委員會）尋日公布，趙必立將會加入香港互聯網金融協會，並擔任政策委員會主席（榮譽）一職，而且已經喺今日正式上班，除咗負責研究金融科技政策，亦會出席研討會等。
委員會認為，趙必立嘅新工作唔會損害或削弱政府履行職能嘅表現，而且唔會引起人擔心趙必立會有延職報酬或利益，以及其他負面觀感而令政府尷尬。不過，委員會就提醒趙必立喺離開政府一年內，唔好代表其委任機構同財庫局往來，而出席研討會嘅講詞內，都唔應該包含同佢出任政治助理相關而可能會令政府尷尬嘅內容。