政情：蔣麗芸馮興禮拳腳過招
立法會議員蔣麗芸（Ann姐）向來中氣十足，而佢尋日就公開展示出「獅吼功」絕技，更抵抗練開拳嘅勞工及福利局政治助理馮興禮（Henry）嘅重拳，Ann姐果然唔係省油嘅燈喎，到底二人交戰，勝負誰屬呢？
其實佢哋並非真正開片，只係Ann姐邀請到Henry拍攝有關健身知識嘅短片，所以片中都營造到武術嘅氣氛啫！條片一開始就突然出現陣風，搞到Ann姐頭髮都亂埋，其實係Henry嘅拳風，都咪話唔誇張。
示範伸展運動教打工仔
Ann姐就迅速擋住Henry嘅攻擊，咁佢當然無受傷，仲自言功力深厚，樂意接受Henry挑戰同佢過兩招添！不過佢哋都無過招，因為Ann姐擔心打傷Henry，就同唔到Henry嘅爸爸，即立法會前秘書長馮載祥交代，結果佢哋一齊示範幾招伸展運動，傳授打工仔可以喺辦公室做嘅運動就和氣收場喇！