政情：黃國教飲咖啡溝埋最香濃
好多人以為貓屎咖啡係最好飲嘅咖啡，原來唔係o架！早前喺一個活動上遇到工聯會理事長黃國同佢哋嘅立法會議員黃國健。黃國講起自己曾經做過炒咖啡，最好飲嘅咖啡，係要將幾種咖啡溝埋一齊，先會又濃又香。
世界上無十項全能嘅人，亦都無樣樣都完美嘅咖啡，一個好嘅團隊要唔同嘅人互相配合，一杯好嘅咖啡都要有唔同嘅咖啡豆互補不足。黃國話任何咖啡都唔會又香、又滑又有咖啡味，好飲嘅咖啡係要溝出嚟，因為有啲咖啡味濃但唔夠香，例如越南，有啲有香味但又唔夠濃，例如南美咖啡就特別香，所以佢以前會將唔同地方嘅咖啡豆溝埋一齊炒，依家飲咖啡，就習慣將南美洲、非洲、東南亞嘅咖啡溝埋一齊，咁香味同濃度等就差唔多。
加牛油粟米一齊炒
佢又話炒咖啡仲要加牛油同粟米，炒完後會香啲，味道都會好啲，佢已習慣每日都會飲咖啡，溝開咖啡，喺出面飲咖啡時都覺得唔太習慣。