政情：一地兩檢 峯鴿案 葉劉呻攰拋波畀雙梁
立法會《廣深港高鐵（一地兩檢）條例草案》委員會前日完成審議一地兩檢草案，但身兼委員會主席嘅葉劉淑儀（葉劉）就因為處理會議手法而被民主派鬧爆，批評佢做法反智，甚至係「廿三條時候嘅葉太返咗嚟」。而另一邊廂，葉劉就「峯搶手機」事件計劃動議譴責立法會議員許智峯，亦因一度打退堂鼓而惹來建制派內部強烈反彈。可能因為腹背受敵，葉劉都大嘆「好辛苦」、「好疲倦」、要「抖一抖」。之不過，隨住委員會完成審議，譴責動議即將提出，葉劉好快就可以將個波拋出去，咁到時就可以鬆一鬆喇！
一地兩檢法案委員會喺審議條例草案期間爆混亂，雖然委員會有驚無險完成審議，但葉劉處理會議嘅手法就畀民主派鬧爆。曾經出任保安局局長、負責力推《基本法》第二十三條立法嘅葉劉，更被身兼一地兩檢關注組召集人的立法會議員陳淑莊揶揄︰「廿三條時嘅葉太返咗嚟」。
將來再有硬任務要諗諗
葉劉尋日喺電台訪問中吐苦水，直言覺得「好辛苦、好嘈吵」，同埋對佢嚟講都搞到好疲倦咁話。被問及將來如果再有硬任務時，仲會唔會照做？葉劉似乎都要諗諗先，只係話到時再算，總之依家就要抖一抖先。好在法案委員會嘅工作已告一段落，草案遲啲就會提交至立法會大會恢復二讀，到時就由立法會主席梁君彥接波喇！
至於對強搶政府女官員手機嘅譴責動議，預計最快於本月廿三日大會提出，之後就會成立調查委員會。由於議案動議人同和議人按例唔可以加入委員會，所以作為動議人嘅葉劉就真係可以抖一抖喇！至於調查委員會預料會有五名建制派同兩名泛民議員，建制派有傳為經民聯梁美芬、工聯會麥美娟、「六人組」馬逢國、民建聯同自由黨亦會各派一人，至於泛民就會有公民黨郭榮鏗同會計界議員梁繼昌。
料梁美芬接手調查峯鴿
早前擔任過譴責熱血公民議員鄭松泰倒掛五星旗同區旗嘅調查委員會主席嘅梁美芬，好大機會會再任譴責許智峯調查委員會主席。對於係咪再任主席，梁美芬就話持開放態度，又話自己都係因為願意喺委員會幫手，先至唔和議葉劉。佢又預計本立法年度成立委員會後，可能最多都只能夠開到一次會議，要等立法會秘書處趁暑假做好準備工作，暑假復會後先正式開波。
一地兩檢條例草案同譴責許智峯動議，一個係燙手山芋，一個就有排搞，葉劉拋咗個波畀梁君彥同梁美芬，佢哋兩個接唔接得住就要睇佢哋造化嘞！