中環出更：蔡德昇讚辯論減紛爭
近年香港社會喺一啲議題上變得好對立，原因之一係欠缺換位思考。尋日一班名人出席一個校際多角度辯論比賽時，都支持以辯論促進社會溝通。主辦單位之一嘅香港青年聯會（青聯）常務副主席蔡德昇（Stanley）就話，試過有次辯論土地問題，一位本身係村民嘅學生被抽中代表發展商，令到學生有機會站在對立面思考問題，十分有趣，亦有助於減少社會嘅爭拗。
Stanley喺澳洲讀中學時都參加過辯論比賽，笑稱自己都係一個包拗頸嘅人。不過當年辯論只有正、反兩邊，容易事前做功課、模擬對方出乜嘢招數，多角度辯論涉及多個唔同立場嘅代表，比較難估，但係因為有得選擇問邊一個，所以好玩啲、開心啲。好似尋日參與辯論嘅四個代表，分別代表青年、創科、傳統企業同政府。
好先生顧東華馬清楠 唔同老婆拗
同場仲有保良局副主席馬清楠、總理顧東華、仁濟醫院主席馮卓能同總理陳李詠詩等董事局成員，事關佢哋旗下學校有學生出賽。青聯主席郭永亮就親自做評審，好忙碌。
講起辯論話題，顧東華同馬清楠喺求學時期都未試過參加辯論比賽。馬清楠係律師，讀書時都要受專業訓練同人拗，但佢笑稱同太太就唔使拗。顧東華都好贊同，話老婆永遠是對的，使乜拗喎。睇嚟佢兩個都係好先生啦，馬清楠就笑稱係小男人就真，好搞笑。
講完笑，馬清楠就認真話香港相比外國同內地，公開演說能力係差啲，佢認為要多啲訓練，好似睇住咁多屆保良局主席，喺上任時站在台上講嘢普遍都比較緊張，但係一年任滿時就發揮得好好啦！
卓妮