政情：林超英唔識「嘥」 跟稿讀都錯
有乜環保嘢可以難到天文台前台長林超英？答案竟然係「大嘥鬼」個「嘥」字！話說環境運動委員會主席林超英尋日出席一個有關環保嘅頒獎禮，佢致詞時就大讚香港環保發展有進步，仲話幼稚園小朋友都識講唔做「大嘥鬼」。點知佢講講吓就自爆唔識寫個「嘥」字，所以講稿要將「嘥」字打晒做交叉。咁喺佢份稿中，「大嘥鬼」咪變咗「大X鬼」囉！
林超英繼續「搞gag搞唔停」，叫在場人士要發揮力量化身「病毒」。不過佢講嘅係「環保大病毒」，仲話希望可以感染埋全香港嘅「小病毒、微病毒」，齊齊推廣環保。佢又話，喺香港搞環保其實好令人洩氣，因為出晒力為環保，最後變化唔大，但再難頂「至少都會頂多幾年」喎。
廣東省讀成環保省
林超英又話，佢從來都唔會為演講寫稿，但尋日好多官員出席，先至「假假地寫咗張」。可惜寫咗稿都冇用，皆因佢跟稿讀都讀錯，將「廣東省環保部門」講成「環境省」，好彩佢一講出口已知衰，即時更正咗喇。