中環出更：容海恩自抽金句狙擊峯鴿
立法會議員容海恩（Eunice）最近又爆金句，早前接受訪問時一句「我覺得議會內外都不應該牽涉太多政治」，成為網民熱話，更畀唔少網民二次創作同類句子結構，Eunice近日於Facebook貼咗一張「自己抽自己水」嘅圖，狙擊因搶手機事件捱轟嘅民主黨許智峯（峯鴿），除咗金句原圖外，下面仲加咗兩張「少講政治都要譴責許智峯」、「少講政治同你講刑事」嘅圖，趁機呼籲網民支持由佢發起譴責峯鴿嘅網上聯署。
網民二創金句成熱潮
Eunice嘅金句突然於網民引起咁大回響，網民嘅二次創作實在應記一功，例子包括「我覺得罐頭鯪魚內外都不應該牽涉太多豆豉」、「我覺得小丸子內外都不應該牽涉太多心事」、「我覺得六合彩中獎號碼內外都不應該牽涉太多數字」等，範疇之廣，創意真係爆晒燈。
因應網民反應熱烈，Eunice借勢「自己抽自己水」，仲識借助呢股熱潮狙擊峯鴿，到底呢個效果係Eunice嘅政治計算之內，定係意料之外，呢個只有佢自己至知嘞！
卓妮