政情：楊文蔚訪壁屋懲教所 跳高作喻鼓勵在囚者
被稱為「跳高女神」嘅香港跳高女子運動員楊文蔚，喺場外場內都聽過唔少歡呼聲，今次佢應懲教署邀請，跳出運動場之外，聆聽鐵窗之內嘅聲音。楊文蔚喺訪問就講到首次進入懲教院所，更透露自己年少時走過歪路，只係未歪到要去到懲教院所。
透露年少走過歪路
懲教署今日推出一套名為「高‧非不可攀」嘅短片，由楊文蔚喺片中擔任壁屋懲教所青少年廣播節目《淺談更生》嘅嘉賓，同在囚人士對話。接受訪問後，佢發覺青少年在囚人士同佢年幼時嘅經歷有啲相似，而佢好幸運遇到現在的跳高教練，改變到自己嘅人生，走回正路。
佢又用跳高比喻人生，話人生係由低開始，跨過咗一關就繼續向上，失敗時就要思考下一場點樣可以迎難而上，佢希望青少年在囚人士日後重回社會，遇到困難時，會諗吓究竟選擇放棄抑或用一百分或二百分嘅努力，證明畀其他人睇，自己其實已經改過自新呢？