中環出更：無懼麻疹 林建康夫婦照去沖繩
日本係港人最熱門嘅旅遊地點，雖然上月底沖繩爆發麻疹疫情並持續擴散到東京同大阪，本港有旅行團對疫情顧慮而要取消行程，但愛沙尼亞駐港名譽領事林建康就冇有怕，計劃同家人去沖繩玩喎。不過，佢哋唔係依家出發，而係等囝囝應付咗考試先，約莫兩個月後先起行。
卓妮尋日喺馬場遇見林建康同佢太太黃寧艷，佢哋都話有留意今次日本嘅麻疹疫情，但兩夫婦細個嘅時候已打咗防疫針，小朋友亦有接種疫苗，再加上兩個月後已踏入暑假，當地嘅疫情大抵已有所紓緩。不過，林太都話起程之前都會參考一下旅遊警告。
譚健業安全至上 唔諗遊日
轉頭見到仁愛堂總理譚健業，佢話早前打算購買三日兩夜嘅機票連住宿旅遊套餐，同家人到日本一遊，然而沖繩麻疹疫情一傳出，佢就立即打消念頭。佢話儘管日本爆發麻疹疫情嘅地方尚未宣布為疫區，但鑑於兒童染上麻疹嘅機會較高，而佢嘅囝囝又只得十歲，縱使曾經打過防疫針，但都係要安全至上。佢又話一家去旅行嘅目的係求開心，而唔係求擔心，與其顧慮麻疹疫情，不如改去其他地方啦，反正適合港人短途旅遊嘅地方多的是。
香港國術總會會長王嘉恩就話近期冇打算去日本，因為佢正忙於籌劃下周日嘅兒童國術大賽。至於有冇措施防止參賽嘅小朋友感染麻疹，佢認為最有效嘅方法係將患者隔離。原來佢六歲時曾染上麻疹，經診斷後要留喺屋企個幾星期，雖然期間唔可以返學又冇得同朋友仔玩，但佢話喺屋企有電視睇，又有模型砌，所以隔離期間唔覺得悶喎。
卓妮