我有正能量：義診 送暖
本港人口高齡化問題嚴重，獨居長者、加上低收入人士、傷殘人士及露宿者等病患，需要仁醫贈醫施藥的弱勢社群多不勝數。有中醫義工團體數年前開始舉辦「中醫社區流動診療服務」，反應熱烈，由於服務需求大，團體去年更於舊區開設義診善堂，由六位醫師於不同時段，各自主理所屬診療科目，提供更全面、持續性更強的免費中醫服務。
「每個月我哋都會出一張時間表，等啲街坊知道我哋唔同時段，有邊位醫師喺度同埋睇咩科，佢哋就可以按番自己需要嚟睇病。」香港健康協會會長朱國棟指，「惠民中醫善堂」於去年七月開始投入服務，選址位處於深水埗、太子及大角咀交界，「附近好多舊樓，希望可以幫到更加多弱勢社群同老人家。」
每周四天 贈醫施藥
朱醫師指，善堂現時每周約有四天營運提供中醫義診服務，包括他在內，現時善堂共有六位中醫師及數位義工，診療科目包括內科、針灸、傷科痛症及癌症，「我哋當然想一星期開足七日，幫到更多病人，但係暫時未有足夠人手，希望遲啲可以做得到。」
採訪當日，善堂正準備提供內科及針灸服務，現場所見，服務開始前半小時已有市民到場排隊，並由義工為他們逐一登記。有求診人士坦言，現時僅靠微薄收入過活，但坊間診金昂貴，「有時病咗都唔想嘥錢睇醫生」，義診正好為他們解決問題。朱醫師指，暫時每個時段會提供十個籌，先到先得，「但係好多時都會睇多三、四個症，睇完醫師先會走，病人一場嚟到盡量都想睇埋。」另外，每位義工都曾接受基本中醫藥理的「速成班」，除了能即場幫忙解答病人的基本提問，亦可和病人分享一些湯水和食療心得。
以心關懷病人情緒
主治癌症的朱醫師，多年來見盡不同身患絕症的長者，他坦言對病人而言，任何靈丹妙藥都也比不上一聲真摯的關懷，「開解到病人嘅情緒已經可以幫輕到病情，所以我哋成班醫師同義工都有同樣理念，就係同求診者傾多啲偈，建立關係，除咗要盡一個中醫師嘅職責外，最好可以行多步，了解病人嘅想法。」
文：陳名仲
圖：甘偉倫