政情：譚志源日行萬步 3個月卸走10磅
依家從事醫療行業嘅政制及內地事務局前局長譚志源，明顯比做官時清減咗。佢話因為有次去內地嘅醫院磅重，一企上個磅，就大大隻字寫住佢標準，不過係標準超重，嚇到佢即刻的起心肝減肥，三、四個月已經減咗十磅。
皮帶都扣入一格
譚志源話，減肥成功嘅秘訣係日行近一萬步，搭少啲港鐵，依家皮帶已經可以扣入一格，好多人都話佢瘦咗。有次去一間有一排冇去過嘅日本餐廳，經理見到佢冇打招呼，直至佢行近才突然認出，話因為佢瘦咗，所以唔認得佢喎，聽見真係超開心呀！
譚志源依家只得五十幾歲，但就要幫公司旗下醫院搞老人科同康復科，佢話冇唔習慣，仲笑笑口話覺得自己可以幫襯喎，聽人講，五十歲後就有機會有白內障、高血壓，膝頭要換關節等等，「所以泊定個碼頭差唔多o架啦」！