政情：信晒手機支付 余嫿深圳甩轆
好多人都話，喺內地出街只須帶住電話，銀包都唔使帶，因為有手機支付。不過有時唔好咁老定，事關意外實在難料。
暖男代埋單唔使還
傑出青年協會主席余嫿（Mary）早幾日就甩晒轆，佢北上去蛇口同客人會面後，獨自去咗一間小菜館食晚飯，準備埋單時先發現手機電量耗盡，無法以手機支付埋單，加上冇帶人民幣喺身，老闆又唔收港幣，點算呢？唔通要落得食「霸王餐」嘅指控？
Mary事後講起件事，話佢當時心諗，唔通今次要「洗大餅」至可以甩身？好彩餐廳內有一位男食客見狀，慷慨幫佢埋單，仲話飯錢只係小數目，叫佢唔使還添！今次免除咗入後欄洗碗嘅厄運，Mary話除咗要感激嗰位暖男之外，都得到教訓，雖然手機支付好便利，但係以後去內地都要帶備人仔現金，以防萬一喇！