政情：再選累街坊 峯鴿議席危 雙姝等上位

峯鴿言行激進，為求出位無所不用其極，同走「和理非非」路線嘅白鴿黨主流派格格不入，加上佢人緣欠佳唔合群，喺黨中央以至佢所屬嘅中西區支部都冇乜朋友。不過，過往由於獲主流派力撐嘅「南區三鴿」區諾軒、柴文瀚同羅健熙，先後因不同理由放棄角逐二○一六年立法會選舉，峯鴿先至可以爆冷上位進身立法會。

爆出「峯搶手機」事件後，黨內有唔少人認為，即使峯鴿可避過建制派提出嘅彈劾動議，亦都唔應該再支持佢角逐連任立法會。首先峯鴿所屬嘅香港島選區，下屆會多咗一位叫做區諾軒嘅對手，區諾軒現已退出白鴿黨，論立場同行動可能比峯鴿更激，試過燒《基本法》同衝撞立法會保安，依家峯鴿醜聞纏身，如一齊選肯定會搶走峯鴿大量票源。

老鴿主流支持 伍姑娘或有機

至於其他選區，建制派亦肯定會借峯搶事件追擊其他白鴿黨候選人，甚至整個民主派嘅選情都受影響，因此有人就提議好似當年對待白鴿黨前立法會議員甘乃威咁，喺佢爆出求愛不遂解僱女助理醜聞後，逼佢讓位放棄連任。

人選方面，「南區三鴿」唔係已退黨就係謝晒，應該唔會再爭。早前勝出中西區區議會東華選區補選嘅伍凱欣係可能人選之一，佢獲得黨內主流派及其他中西區老鴿支持，近日公開要求峯鴿辭職嘅前主席劉慧卿，就係伍姑娘嘅支持者。

此外，已故前立法局議員吳明欽嘅女兒吳思諾，最近亦獲白鴿黨力捧，希望佢能繼承父業進身立法會。佢原意係喺九龍西出選，但該區已有另一白鴿黨區議員袁海文排緊隊上位，隨時爆發爭位戰。如果最後峯鴿被黨友DQ，吳思諾轉往香港島參選，咁就一次過解決晒兩個問題喇！

民主黨繼續護短 稱不棄峯鴿

隨着峯搶手機醜聞不斷升溫，立法會議員容海恩發起網上聯署，爭取市民支持建制派譴責峯鴿嘅動議，重建大眾對立法會嘅信心。而民主黨尋日舉行閉門交流會討論有關事件，並交代中委會凍結峯鴿黨籍的理據。該黨主席胡志偉會後話，經過一番解釋後，反應較大的黨員都理解中委會決定，但對於外界指該黨會放棄峯鴿，他強調絕無此事，因為目前的證據不足以令許智峯失去議席，但是否支持譴責動議，就要考慮所有證據後，再作結論。

另外，有民間團體發起聯署，強烈譴責政府「狗仔隊」監控議員的行徑可恥，要求立法會即時追究事件的來龍去脈，據悉至今有近一千二百名市民和團體參與聯署。有學者認為政府應公開「狗仔隊」收集到的議員資料，以釋侵犯議員私隱的疑慮。