中環出更：首誕教授理事 華商會書香濃
國際華商協進會（華商會）早前舉行就職典禮，由會長羅台秦（Louisa）連任做多一屆。由於Louisa做過科技大學教授，所以今屆有兩名來自台灣嘅科大教授邢怡銘及宗福季加入理事會。難怪台北經濟文化辦事處處長嚴重光話，華商會唔止有生意人，仲愈來愈有書香味添！
科大候任校長史維都有到場，佢係航空航天專家，曾領導多項由美國政府及機構資助嘅研究計劃，包括研究未來太空運輸。唔知佢心中有冇一幅未來人類同其它星球關係嘅藍圖呢？佢就笑笑口話，人類繼成功登月之後，下一步最想克服嘅就係登陸火星，甚至探討移民，佢話去火星嘅運輸工具唔係技術問題，而係成本太貴問題。
史維感慨地球問題
講講吓，佢突然好感慨話，地球人口太多，想搵多一個宜居嘅星球係可以理解，但現時全世界有好多問題，包括貧富不均、氣候暖化等，人類係咪應該諗吓，有錢都應該用嚟優先解決地球嘅問題呢？大家都話科學家諗嘢只係技術行先，估唔到史維都咁悲天憫人，仲好愛錫地球添！
同場仲有華商會顧問會長陳趙滿菊（Joise）、常務副會長吳肖梅同埋港澳台灣同鄉會會長陳銘富及副會長劉孝超等人。早前卓妮講過，Joise嘅老爺、福建社團聯會永遠名譽主席陳守仁嘅幾名子女好孝順，會編更表確保日日有人陪老人家。Joise笑笑口話確係有呢個家規，佢同老公陳亨利就逢星期五「當值」，不過一到星期日就全家大團聚，齊人時有成三十幾人咁多添！
卓妮