政情：DSE免考試費縮沙 梁紀昌怪港人太聰明
雖然學生哥都好怕考試，但對於投身社會多年嘅人來講，就未必再視考試為畏途。鮮魚行學校前校長梁紀昌話自己年少時係清貧學生，曾經依靠助學金繳付會考費用，所以早前政府財政預算案提出豁免明年中學文憑試（DSE）收費，佢都覺得係一件好事。不過政府後來縮沙，改為只得學校考生受惠，佢就怪香港人太聰明喎。
畀佢重考會選擇歷史科
梁紀昌話香港人太聰明喇，不斷鑽空子、挑漏洞，搞到政府要「縮沙」，否則唔單止昔日考試成績唔理想嘅人多咗個機會重考，離開校園一段時日嘅人，都可以自我挑戰一下，睇吓自己學過嘅知識仲剩番幾多。梁紀昌仲話，如果畀佢重考，就會考中國及西方歷史咁話。
考試溫書 提升文化水平
梁紀昌又話，如果要應付考試，就要重拾書本，譬如考中文就一定會重溫古典文學，相信可以提升大家嘅文化水平。社會有聲音指容許唔同程度嘅人一齊考試，會對日校學生唔公平。梁紀昌就認為，只要對自修名義應考者另設評分標準，就可解決問題喇。