政情：哀哉本地波 貝鈞奇寧願有黃牛炒飛

有人炒即有人撐

其實貝鈞奇只係從樂觀嘅角度去睇黃牛飛。佢話，近期黃牛飛最為猖獗嘅都係演唱會同音樂會，甚少係同體育項目有關，除非有英超球隊嚟香港作賽，先會有炒賣情況。佢又呻，本地足球冇人睇，唔會有黃牛黨炒賣本地球賽門票，所以先至話希望有人炒賣，因為咁樣就代表多人支持本地足球喇。

貝鈞奇又話，二○○三年西甲勁旅皇家馬德里訪港，當時都有嚴重黃牛飛問題，足總都承受唔少壓力。而香港足球最興盛嘅時代，仲會有長長人龍排隊買波飛，加上球場容量細，所以經常出現爆棚場面。佢慨嘆相比起以前有球星坐鎮、洲際賽事又有好成績，現今一代較難令到球壇興旺喎。