政情：林奮強豬肉刀對準政府轟派錢唔公平
政府今年發表嘅財政預算案被圍插，在各個政黨夾擊之下，再次「開水喉」派錢平息民憤。政府派錢已非首次，曾經出任過行政會議成員嘅「香港黃金五十」創辦人林奮強就唔撐政府派錢，批評政府派錢措施只係「平等」，並唔係公平。問到點解唔撈番投資銀行老本行，反而咁關心公共財政議題，佢就話從事投資銀行廿幾年，好似斬豬肉斬咗廿幾年咁，係時候做番啲有興趣嘅嘢，似乎佢想將把豬肉刀對準政府弊政喎！
做投資銀行出身嘅林奮強，最經典一役係當年成功預測金融風暴。一九九七年香港回歸，樓市原本飆升，股市亦氣勢如虹，當時佢做地產分析，竟然睇淡樓市，認為未來本地住宅及寫字樓嘅樓價都會下跌。點知之後亞洲金融風暴殺到嚟香港，一切都被佢講中；而喺金融風暴期間，佢仲出任中央政策組非全職顧問添。
眼光獨特嘅林奮強幾年前成立咗智庫「香港黃金五十」，仲好關注公共財政。佢話做咗投行廿幾年，就好似斬豬肉咁斬咗廿幾年，係時候做番啲感興趣嘅事，以及回饋社會，所以已經好耐都冇研究投資市場喇，轉為關注公共財政及醫療議題。
形容為「730萬人爭產案」
講到公共財政，過往政府庫房「水浸」時，都試過向市民派錢，到今屆政府有逾千億元財政盈餘，財政司司長陳茂波發表財政預算案後，亦在各界壓力之下，向合資格人士派發四千元，形成政府一有盈餘就要派錢。不過，一講到派錢，林奮強就好勞氣，佢認為社會混淆咗「公平」同「平等」兩個概念，話派四千元係「平等」，因為人人有份瓜分財政盈餘，但係連冇納稅嘅人都有得分，就有失公平喇！
林奮強仲反問，如果阿媽（納稅人）畀錢個仔（政府）落街買豉油，買完剩低嘅錢係應該畀番阿媽，定係由個仔自己袋落袋呢？佢形容依家成件事就演變為「七百三十萬人嘅爭產案」咁喎。林奮強真係妙語連珠，睇嚟佢唔做「豬肉佬」，都可以去開咪針砭時弊，狠批呢個冇靈魂政府。