中環出更：譚文豪唔益政府 買樓「一換一」避辣招
立法會早前審議「單一住宅物業」嘅定義，為樓市辣招補漏杜絕以一份合約購買多個物業避稅，議員譚文豪（Jeremy）就申報話自己有一項仍在進行中嘅物業交易，強調唔會因修例而得益。佢之後話個單位係買嚟自住，屬於長期樓花，原來仲係「一換一」，即喺新樓入伙後出售舊物業，避免支付雙倍印花稅（DSD），唔使畀多一倍稅益政府。
「睇樓精」心癢癢
Jeremy現時向立法會申報有四個物業揸手，都稱得上係泛民嘅「樓王」。日前傾開先知佢原來仲係一個「睇樓精」，有個癖好鍾意去睇樓，佢話以前做飛機師，飛完一轉就會放一兩日假，放假最鍾意就去搵樓睇，港九新界邊度都去睇，可惜做咗議員變咗公眾人物，就好難四圍去睇樓喇，所以有時都會心癢癢。
按二○一六年嘅選舉申報，Jeremy報稱住喺荔枝角一個屋苑，但佢有一對龍鳳胎同兩隻狗，可能唔夠地方住，相信買新物業都係想搬大屋，同家人住得舒服啲。佢話收咗新樓後就會賣咗依家住緊嗰間，唔會積貨。講到新屋點設計，Jeremy話要優先考慮小朋友夠唔夠地方住，而佢喜愛嘅音響都要擺埋一邊。
卓妮