中環出更：無人種田隨時失傳 胡劍江搶種家鄉柑
隨住飲食習慣愈趨西化及務農人口減少，好多中國傳統美食都有失傳危機。早前卓妮同一班城中名人傾開呢個話題，唔少人都有同感。香港鑽石總會副主席胡劍江（Michael）幾年前因為驚愈嚟愈少人種田，家鄉嘅柑會失傳，於是拍住食物及衞生局前局長高永文將二千株柑移植咗去廣東鬱南，點知收成過一次之後，就因水土不服而失敗收場。
水土不服 再接再厲
Michael笑笑口話，當初憑住一股傻勁，好認真咁搵專家揀靚品種及實地考察，點知收成過一次之後，就因水土不服而失敗，結果種唔成都冇符。不過佢就話唔會氣餒，打算再搵適合嘅品種返香港種，至於確實嘅地點就要保密先喎。
驚家鄉美食會失傳嘅仲有百仁基金前主席施榮忻，佢話福建人習慣用番薯粉醃肉、煮湯羹，但依家市面上好難搵到古法製造嘅番薯粉，傳統嘅做法係將番薯切片曬乾之後再磨成粉，依家佢屋企都係搵鄉親做先至有得食咋。施榮忻二哥施榮懷近十幾年經常去北京，所以煉成咗個北京胃，佢就鍾意食北京地道嘅滷煮火燒，即係豬雜，形容呢種美食只係京城人先至識食。
本身係浙江人嘅香港手套大王第二代詹嘉莉（Kelly）就感嘆野生黃魚愈嚟愈難搵，所以貴得好誇張。講講吓，佢話最近經常去福建，因為喺晉江投資生產橡膠雨鞋，有一次食當地著名嘅土筍凍，望落好似大菜糕，好好味，但原來入邊係海蟲嚟。
Kelly笑稱知道係蟲蟲之後覺得核突，不過既然當地人都係咁食，應該冇事嘅，下次都會再試喎。
卓妮