香港政府成日叫人唔好做「大嘥鬼」，又叫人要「珍惜食水」，切勿浪費資源，講到好似「棒打鴨子──呱呱叫」，實際情況卻是「婊子立牌坊──假正經」。呢，並非老朽胡說八道，亂咁屈冇神經政府㗎，據申訴專員公署指出，香港水管的整體滲透率達到百分之十五點二，同新加坡僅約百分之五相比，明顯輸咗成條街。若以此標準計算，香港每年便浪費了九千六百萬立方米食水和二千七百萬立方米鹹水，單是浪費的食水量，就夠二百萬人使用一年，亦等同年嘥五點三億元公帑。阿哥，呢筆錢用來買午餐肉罐頭或叉燒飯盒，你話可以造福幾多窮人？
除此之外，香港爆水管更成為常態。申訴署指水務署後知後覺，好似大窩口邨對出嘅大廈街，該處水管使用超過三十年，鹹水管在一四至一五年間爆足九次。而北角城市花園附近嘅水管也用了三十年，五年內爆水管十四次，可惜仍未列入爆喉熱點名單而加快處理。香港從大型基建到換地下水管都慢如牛步蝸行，你話香港點同新加坡比？點同深圳比？曾幾何時，「香港速度」係我哋嘅驕傲，係「獅子山下精神」嘅一種動人力量，教每一個香港人感到面上有光彩；但如今「香港速度」已變成笑話，叫人情何以堪？
去年老朽在本欄才揶揄香港爆水管處處開花，香港有、九龍有、新界有、離島有，條條大路有噴泉；人哋就春城無處不飛花，我哋就香城無處不噴水，你話喇，今個夏天使鬼去水上樂園玩咩，着定泳衣泳褲，行行吓街或揸揸吓車，分分鐘有驚喜！
香港之所以成為「噴泉之城」，水務署管理不善、效率奇差彰彰明甚。早前林鄭出席立法會答問會，議員連杜絕「黃牛黨」、「公廁衞生太惡劣」也要佢關注，看來，以「執行力高」見稱的林鄭，冇理由唔關注爆喉狂嘥公帑事件啩！