政情：田北辰暫代主席 陳健波「一半」支持
立法會財務委員會主席陳健波一向勤力，甚少缺席會議，不過佢尋日主持會議時突然煞有介事話有事要離開，仲將會議交畀副主席田北辰（田二少）主持。佢又叮囑其他議員繼續支持田二少，但點知就叫大家給予「一半」支持，唔通正、副主席二人不和？
議員聽錯 「一貫」變「一半」
陳健波於會議表決第一個項目時話，因有事務要處理，會喺表決後將會議交由田二少主持，更叮囑議員要以一貫熱誠態度去支持田二少。不過，有議員冇聽清楚，仲好驚訝咁問係咪用「一半」熱誠，陳健波聽到都不禁失笑，惟有重申佢係話「一貫」，而非「一半」。
另外，有泛民議員聽到陳健波要提早離開就特登玩嘢問「係咪以後唔返嚟」，陳健波則迅速反擊，話因為對方唔想佢返嚟，佢就更加一定要返嚟咁話，為嚴肅嘅會議室帶來一輪歡笑聲，連佢自己都講笑話要喺冗長會議中苦中作樂。
陳健波尋日其實係為貿易發展局活動作主禮嘉賓，預料活動結束時間同會議完結時間相若，所以就唔返立法會喇，佢仲話當畀田二少練習喎。