中環出更：中美貿易戰如箭在弦 商界有得震冇得瞓
中美貿易戰如箭在弦，雖然美國方面仍待召開聽證會先至決定係咪開打，但係中美雙方不時加碼公布清單「晒冷」，已經嚇到商界有得震，冇得瞓。家族做玩具及嬰幼兒用品等輕工業產品嘅圓玄學院副主席湯修齊（Henry）話，佢哋嘅產品主要係出口美國，雖然暫時美方公布嘅加稅清單只限於高科技產品，但都擔心萬一戰況升級，好快就燒到埋身。
Henry話，懲罰性關稅一旦實施，將令美國嘅通脹率上升，到時當地人嘅購買力減弱，最終令以美國出口為主嘅企業遭池魚之殃。做科技及機械產品展覽嘅善德基金會總理梁天富都擔心，貿易戰開打可能令雙邊貿易額縮細，連鎖效應下，做展覽生意都難以獨善其身。
徐珊雯指打得成機會微
幫美國鐘錶品牌做代工嘅博愛醫院總理吳志雄就話，加徵關稅清單暫時未見珠寶鐘錶、鞋物衣着等消費品，不過佢好擔心漣漪效應。對於中方曾經放話會以人民幣貶值應對，變相補貼受到美方加徵關稅影響嘅出口企業，佢笑笑口話都係好事喎。香港鐘表業總會會董徐珊雯及韓嘉軒都好關注戰況發展，不過徐珊雯認為最終打得成嘅機會好微，因為對美國自身經濟嘅傷害都好大。
一講到貿易戰，香港玉器商會會長羅志光、副主席何志生及副會長岑醒文就牙痛咁聲話影響好大。咦？清單上都未見有珠寶玉器，點解咁驚青？羅志光笑笑口話，因為若果大家賺唔到錢，又點會買玉器呢啲奢侈品呢？所以最好咪打，仲話唔打仗嘅地方先至係天堂喎。
卓妮