開講有話：「人多好辦事。」偏偏套用喺立法會嗰班政客身上就啱啱相反，佢哋人就夠晒多嘞，不過關鍵時刻總係發揮唔到作用，唔止倒米累事，事後仲一味互相卸責，互相扯皮，香港人有啲咁嘅質素議員真係喊得一句句吖。
呢呢呢，就尋日之嘛，立法會《廣深港高鐵（一地兩檢）條例草案》委員會再次開會，為報前幾日人數不足導致流會之仇，建制派率先發難，起勢鬧爆反對派係流會罪魁禍首，批評有人情願企喺議事堂出面睇電視都唔入去開會，係「扮聾」、「扮盲」同「詐瞓」喎，講得好理直氣壯o架。反對派亦唔係善類，被人公然打臉，梗係好似機關槍咁一輪嘴反擊喇，窒爆建制派唔夠人嚟開會怪得邊個。一場互相指罵嘅五十步笑百步鬧劇喺議事堂上演，講到底無非為自己開脫啫，簡直唔知醜字點寫。
睇到喇，呢班所謂嘅尊貴議員一係唔開會，一係就狗咬狗骨，有破壞冇建設，噴吓口水又收工，既浪費納稅人金錢，又浪費香港人時間，唯一冇受影響嘅係佢哋嗰份高薪厚津，有人話垃圾會議員係全世界最筍嘅工，真係一啲都冇誇張（口架）。
講真，反對派為拖垮「一地兩檢」，無所不用其極搞亂檔就梗嘅嘞，但建制派又好得幾多呢？明明人多勢眾，明明可以立於不敗之地，只要佢哋人人盡責開會，反對派點樣搗亂都起唔到作用，又何至於搞到流會收場吖？呢，過去傳媒每次點算立法會大懶蟲，建制派梗係獨佔鰲頭，就知佢哋係扶唔起嘅阿斗。仲有呀，幾年前政改表決，建制派鬧出「等埋發叔」嘅笑話，你話佢哋係咪成事不足、敗事有餘吖？
當然喇，如果話建制派唔爭氣，港府就更加係手指拗出唔拗入。大家都知，反對派之所以拉布流會當食生菜，搞事搞到有恃無恐，咪就係睇死港府唔敢出手撥亂反正囉。淨係一個新丁區諾軒咋，又衝擊主席台，又表演「仆街」，擺明阻住地球轉。之但係點解佢會入到立法會大門呀？咪就係多得林鄭大和解囉。唔係「好打得」為咗博取反對派歡心，呢條友仔又點可能入閘參選兼當選，仲將每月十多萬元薪津袋袋平安吖。搬起石頭砸自己嘅腳，怕且呢個世界只有港府係咁戇居咯。
講起都激氣，建制派遠有二十三條立法臨門一腳有人玩倒戈，近有立法會流會及互相指罵鬧劇，次次都係幫倒忙，家陣高鐵通車迫在眉睫，一地兩檢立法不容有失，建制派仲喺度嘥時間同反對派開拖，隨時誤咗大事嘅咋，唔該醒少少，咪中計喇。