政情：議辦兩遭塗鴉 張國鈞任畫唔嬲
唔少立法會議員同區議員都試過橫額被損壞、塗鴉、惡搞嘅情況，身兼中西區區議員嘅立法會議員張國鈞（Horace）位於上環嘅地區辦事處鐵閘亦都被塗鴉，仲要係兩次，不過Horace就冇嬲，仲將個塗鴉保存落嚟，究竟點解呢？
叫政府畀多啲藝術空間
其實Horace辦事處嘅塗鴉係澳洲著名當代藝術家Anthony Lister嘅作品。Anthony Lister早喺二○一二年經過該辦事處時就即興喺鐵閘上塗鴉，今次再嚟香港，發現當年嘅作品仲喺度，就聯絡辦事處並再重畫作品。
Horace對於Anthony Lister兩度光臨都好歡迎，仲話香港成日被人話係「石屎森林」，可以諗吓喺區議會提議，叫政府拎啲地方出嚟畀啲藝術家發揮，亦係為市民提供多啲藝術空間咁話。唔知市民又覺得佢辦事處嘅新塗鴉靚唔靚呢？