俗語話：「蘇州過後無艇搭」，用嚟形容人錯失時機，後悔莫及嗰種慘情，不過點慘都慘唔過原本諗住坐郵輪去歎世界，點知因為啟德郵輪碼頭泊位已滿，搞到要兜去冇雷公咁遠上船咁慘情吖！難為港府仲話要發展郵輪旅遊喎，管理好啟德郵輪碼頭先講喇！
件事係咁嘅，以啟德郵輪碼頭做母港嘅本地郵輪「世界夢號」，三千名乘客原定上周五喺啟德郵輪碼頭上船展開三日兩夜海上之旅，殊不知咁大個碼頭居然只有兩個泊位咁大把，而且早就預留畀兩艘世界級郵輪專享，卒之搞到幾千個乘客要轉去設備簡陋嘅啟德碼頭坐接駁船上郵輪。咁仲唔止，期間旅遊巴不敷應用，乘客要呆等兩粒幾鐘，上到車又要再等多兩粒幾鐘，前後足足折騰咗五粒鐘先成功登上郵輪，乘興而去敗興而返，唔谷氣就假。
好明顯喇，成件事根本就係大細超，歧視本地郵輪就真。咪睇郵輪碼頭耗資逾八十億元興建，其實成本同效益完全唔成比例，碼頭管理能力沒有最低，只有更低，以啟德郵輪碼頭做母港嘅郵輪冇得優先使用泊位，反而大約一年來港一次嘅郵輪就獲得厚待，唔通本地客唔係客，外國客先係客？枉當局咁多年嚟燒成過億元公帑宣傳啟德郵輪碼頭，今年施政報告仲話要將一千四百萬元撥作發展郵輪旅遊，結果一鋪就將乘客玩殘，聲譽掃地，同倒錢落鹹水海有乜分別呀！
係人都知，啟德郵輪碼頭啟用五年，同死城冇乜分別，審計署都忍唔住點名批評郵輪碼頭泊岸次數同旅客人次唔達標，「東方報業民意調查」嘅受訪者更加係一面倒畀嬲嬲。梗係啦，碼頭唔止交通隔涉，入面仲得幾間食肆咁大把，真正冇啖好食，個場十室九空想血拼更加唔使旨意，連「食、玩、買」都滿足唔到旅客，想有人氣都難。仲有呀，早幾年碼頭初開，吸引到世界最大郵輪之一嘅「瑪麗皇后二號」乘客做「白老鼠」，點知一試就試出碼頭交通配套完全唔掂，鬧出過千名旅客大排長龍等的士嘅醜聞。幾年過去嘞，交通配套依然天殘地缺，有人講笑話，安排客人坐接駁船上郵輪可能係苦肉計，目的係避免再出現千人逼爆碼頭等的士嘅大場面，你話係咪醜怪吖。
講到尾，要搞旺郵輪碼頭唔係冇計，本報多年前已建議過港府可以向澳洲悉尼達令港借鏡。可惜吖，無能政府死性不改，係都要以撞板為榮，連本來可以萬眾矚目嘅郵輪碼頭，竟然都可以搞到變成逢落雨就漏水兼老鼠為患嘅死場，特衰政府廢成咁，神仙都難救喇！