政情：今日你上鏡：馬清楠同爸爸銅像似餅印

保良局總部大樓關帝廳內有一個銅像，同保良局副主席馬清楠（CN）好似樣，原來呢個銅像係CN嘅爸爸馬錦明。望真啲，兩父子真係成個餅印咁。CN笑笑口話，好多人見到個銅像，都話佢好似爸爸。其實馬錦明喺上世紀六十年代做過保良局主席，積極參與保良局善業幾十年，所以局方喺佢過身後特登設立呢個銅像以示敬意，CN嘅太太馬丘瀚如都話好相似，件事亦成為保良局嘅一樁趣談美事。