政情：畢東尼腳腫 畀鄺葆賢逼入院

旅行完變「拖鞋議員」

Anthony去到聯合醫院急症室，就同醫生講「我好忙」唔想入院，點知醫生話「我知啊！都要入。」睇真啲，原來睇症嘅係任職急症室醫生嘅九龍城區議員鄺葆賢。Anthony笑稱，當時覺得自己好小事，都唔敢同人講自己係區議員，所以同其他市民一樣等咗幾個鐘，等到飯都冇得食。結果入院幾日後，仲未好番晒就趕住出院工作，都唔知中咗咩毒。

依家佢行路拐吓拐吓，成個區議會都知佢變咗「拖鞋議員」，因為隻腳腫到着唔到鞋。去旅行原本開開心心，點知一個唔好彩就搞到痛苦收場，真係陰功。