政情：學瑜伽拉鬆筋 邱詠麒「長高」3厘米
做運動有唔少好處，除咗身體健康，仲可以長高，不過增高係青少年發育時期嘅事，好少聽講成年人仲可以再長高。百仁基金副主席邱詠麒（Josephine）就自爆，約一年前開始學瑜伽，竟然長高咗三厘米，令佢相當驚喜。
Josephine話，聽人講到廿一歲之後就好難再長高，估計自己並非真正長高咗，而係學瑜伽拉鬆咗啲筋，改善咗寒背問題，令佢拉到原本應有嘅身高啫。佢話，兩位家姐聽到佢有得長高，依家學瑜伽仲勤力過佢添呀。
返工前做運動醒神
Josephine又話，香港生活節奏急促，覺得做瑜伽能幫佢減慢生活節奏，跑步等運動亦有好多好處。依家佢習慣朝早八點幾做運動，十點左右返工，全日都覺得特別醒神。之前試過放工後先做運動，結果反而瞓唔着喎！