政情：次輪補選 九西建制代表 梁文廣戰李梓敬？

梁美芬愛將 經民聯力撐

上月立法會九龍西補選民記深水埗區議員鄭泳舜爆冷當選，為建制派首次於補選取得零的突破，於是令有建制派中人對次輪補選懷抱希望。由於民記喺首輪補選已有進帳，次輪補選應該都要讓路予其他建制黨派喇。而首個蠢蠢欲試嘅就係工記，事關工記大本營一直喺土瓜灣，過去多年均想派人進駐九龍西，若要比併知名度，曾任立法會議員長達十二年嘅建制派重炮手王國興實屬不二之選。不過王國興就話，佢暫時都冇呢個打算，但如果有需要，都會服從大局義不容辭。

至於經民聯內部則傾向支持梁美芬「愛將」梁文廣，並積極爭取由佢出線參選。掛住經民聯同西九新動力兩個牌頭嘅梁文廣，已分別兩度參選區議會及立法會。前年立法會換屆選舉，當時身兼公屋聯會副主席嘅梁文廣喺梁美芬名單排第二，最終梁美芬獲近五萬票，票數係梁美芬三度參選立法會嘅最高紀錄。當時已有傳梁美芬有意喺下次立法會換屆選舉尋求擴大九龍西版圖。不過梁文廣知名度唔高，如果真係派佢出選，真係要急起直追谷人氣至得。

李人氣趨升 欠地區樁腳

如果講人氣，近年主打假難民議題嘅李梓敬可以話進步不少。然而自由黨於九龍西勢孤力弱，只有小量區議員樁腳，政界對於李梓敬能否脫穎而出成為建制派代言人，同民主派代表一決高下都抱有疑問。李梓敬回覆時就話，上月補選結果反映單議席單票制下，建制派最重要係團結，佢直言一直有意入立法會平台，如果獲建制派推舉，佢好樂意出選咁話。

不過民主派喺首輪補選失守，喺呢個慘痛教訓之後，相信佢哋都唔會再掉以輕心。建制派要再次得勝並非易事。不過建制派都可以視補選為「試水溫」，為二○二○年立法會換屆選舉作準備。