中環出更：學整網頁謀後路 鄭松泰半途而廢
前年倒插區旗同五星旗而被裁定罪成，其後因此失去香港理工大學教職嘅立法會議員鄭松泰，早排走去學整網頁，諗住可以自我增值之餘，仲可以為未來謀定後路。之不過佢學咗兩堂就冇繼續學，只係三分鐘熱度咋。
學咗兩堂嫌難
近年唔少人都會學吓整網頁或者寫應用程式，因為可以接吓工作賺外快，收入都唔錯o架。鄭松泰個囡囡泰妹喺上年出世，六月尾先至夠一歲，似乎搵奶粉錢條路仲好長。鄭松泰都坦承正因為咁，所以早排同朋友傾開偈，朋友建議佢學整網頁，話學得成嘅話，一單工作可以有過萬蚊嘅收入添！
鄭松泰話呢位朋友係IT人，除咗指點佢之外，仲畀埋網上教材，等佢可以唔使特登去搵課程資料。不過，佢學咗兩堂就冇再學落去，事關佢係文科人，唔係科技人才，所以覺得好難。除此之外，佢仲話因為議會工作好忙，冇乜時間睇住片自學，所以半途而廢喇！
卓妮