中環出更：周樹堂教飲沉香 翻煲沖茶清腸胃
被喻為「木中鑽石」嘅沉香一直有捧場客，多數人會用於擺設或製成飾物戴喺身上，「沉香大王」、周大福後人周樹堂（Stephen）就時不時會用嚟煲水飲，因為可以清腸胃。不過佢自爆有次飲得太多，差啲變肚屙添！
Stephen笑笑口話，沉香原本就有藥用價值，所以有時食滯咗或消化唔好，就會用一小片沉香煲水飲。佢話一塊沉香可以翻煲好多次，之後味道會慢慢變淡，但係曬吓太陽又會變番濃味，好神奇，所以一塊沉香用幾年都得喎。Stephen太太張吉紅都話，沉香茶味道好清香，仲好味過飲茶。
傅強年憂古代詩詞失傳
Stephen好喜愛中華文化，所以結識唔少文人雅士。呢一日就係同內地著名當代詩人傅強年、中華文化產業國際聯合會會長梁紹莊（Tommy）等人聚首一堂，大談中華文化，喺外國定居嘅Stephen大仔周康維都專程返嚟趁熱鬧。
來自北京嘅傅強年除咗寫詩，近年都寫埋書法及作畫，因為想將詩中意境呈現出嚟。佢現時喺新加坡、馬來西亞教古代詩詞，即唐詩宋詞，慨嘆內地愈嚟愈唔重視古代詩詞，擔心將來會失傳咁話。
喜歡結合古文化及現代科學理論、鑽研術數流年嘅Tommy好搞笑，佢話四千幾年前黃帝發明指南針，但係明明支針指住北方，點解會叫指南針呢？佢諗咗成年都無法拆解疑團，早排成日嚟探Stephen，聞得沉香多，結果個腦突然開竅，原來係同黃帝呢位大軍事家兼醫學家，將八卦文化應用於軍事及人體醫學上有關喎！
卓妮