政情：李偲嫣派喜帖 五月出閣擬設示威區
正義聯盟主席李偲嫣舊年同現職香港專業進修學校國際教育部副總監謝鋮浚（鋮浚哥）訂婚，近日向好友派帖，兩人將於五月五日舉辦婚宴。偲嫣尋日喺社交網站上載喜帖同公布婚禮流程，而佢曾接受傳媒訪問時話會考慮增設示威區，唔知最後會唔會變成鋮浚哥嘅示愛區呢？
感謝各界祝福
自從偲嫣同鋮浚哥嘅戀情曝光後，吸引到唔少人留意，而佢哋嘅喜帖上印有婚照，偲嫣穿上一件平口無上肩婚紗，輕輕地依偎喺鋮浚哥嘅身上，右手更放喺鋮浚哥心口，兩人甜絲絲嘅笑容，足見一對幸福戀人嘅喜悅。偲嫣發貼感謝各界好友祝福，希望大家可以見證佢踏上人生幸福美滿嘅道路，以及佢同鋮浚哥嘅愛。
另一邊廂，鋮浚哥亦都喺社交網站放閃，寫出愛的宣言，「忠愛一生，永不改變」，又以英文道「Darling, just hold my hand. Be my girl, I'll be your man. I see my future in your eyes.」意即「親愛的請捉緊我的手，成為我的女人，我將成為你的男人，我在你眼內看到將來。」