開講有話，江山易改，本性難移！想嗰班搞是搞非嘅反對派肯聽話「大和解」，洗心革面唔再逢中必反？發夢冇咁早。就算林鄭月娥充當另類黑金金主向反對派豪捐三萬大元，但反對派一於冇面畀，錢照收，枱照反，話口未完，又有議員喺議會玩達陣衝擊喇。
呢，尋日立法會討論《廣深港高鐵（一地兩檢）條例草案》，又因為反對派政客一再衝擊主席台抗議而兩度被迫暫停，月中先喺立法會補選勝出嘅區諾軒，更加以百米衝刺嘅速度衝向宣讀緊條文嘅官員掟文件，與保安發生衝突，結果當場「仆街」，仆低咗嘅區諾軒連眼鏡都飛埋出嚟，簡直醜態百出。其實有逢中必反嘅反對派坐得喺議會度，就預咗烏煙瘴氣，亂象叢生，浪費納稅人公帑o架嘞，連作為新丁嘅區諾軒都急不及待要做番場戲，博取曝光率，向班支持者交差，但係就難為咗班保安啫，對住呢班似美式足球員玩達陣多過議事嘅政客，返工要冒住被人兜心口撞嘅風險，真係着住古代鎧甲都唔掂呀！
話時話，區諾軒唔只撞親保安，仲直頭掌摑埋特區政府，事關冇特區政府確認佢嘅選舉提名有效，一個曾公開主張自決嘅政客點可能入到閘仲當選埋？仲要呢頭宣誓擁護《基本法》，嗰頭就請香港眾志成員做助理，即係港府變相用公帑資助呢班港獨、自決派？前全國人大法律委員會主任喬曉陽都話，一個焚燒《基本法》嘅人宣誓擁護《基本法》係「滑天下之大稽」，但其實最滑稽、最莫名其妙嘅係放班自決派入閘嘅港府，有人質疑港英餘孽同反中亂港分子打龍通，唔係冇根據o架！
特區政府搞大和解上晒腦，冇晒底線，點止明撐暗助自決派進入議事堂吖，連法治都可以踐踏埋。大家有眼睇，壹淫媒老闆漢奸黎無論係宣淫販賤、黑金禍港、策劃佔中定係大宅僭建再僭建，港府唔係坐視不理，就係高高舉起輕輕放低。仲有喎，漢奸黎上年喺「六四集會」以粗口辱罵兼刑事恐嚇東方記者，打壓新聞自由，明明有圖有片，證據如山，點知律政司拖近十個月都唔提出檢控，對東方四度發信質詢，律政司嘅回覆更係含糊其詞，擺明又係玩放生喇。乜鬼「大和解不以犧牲法治為代價」喎，事實係啱啱相反。
最好笑係講過「無理由可以容忍港獨」嘅林鄭，唔只自打嘴巴，放生自決派入議會，搞大和解又被反對派收完錢再兜巴星，自己打腫完左邊面，再畀右邊面人摑，啪啪啪啪，林鄭唔只「好打得」，仲腫過豬頭添啦！