政情：梁耀忠刮花枱賠$600 想拖邵家臻落水
去年年底立法會進行修改《議事規則》大戰，到最後表決當日，唔少民主派議員都表現得非常激動，最後仲有十一人被逐離場。混亂過後，街工梁耀忠（阿忠）收到立法會秘書處一封信，話佢刮花咗會議廳張枱要賠錢，到底幾條痕值幾錢？盛惠六百大元。
當日阿忠、民主黨涂謹申同鄺俊宇，喺最後關頭企喺位一邊大叫「反對修改議事規則」，一邊撕爛本《議事規則》，期間阿忠又攞住本《議事規則》敲打張枱，直至事後收到秘書處封信，佢先知刮花咗張枱。
最終都自己埋單
阿忠話「連邊度花咗都唔知」，應該係本《議事規則》有釘，敲嗰吓刮花咗，咁就要畀六百蚊。佢又同社福界邵家臻坐隔籬，見啲痕好似喺兩人座位中間，曾向邵家臻戲言：「係咪你有份o架？」最終阿忠都係自己埋單，話刮花咗再整番好都係要錢嘅。