政情：捐款話「大和解」闖禍 林鄭搵下屬孭鑊

死撐捐款「人性化」「友情」

林鄭上周二（20日）出席民主黨黨慶籌款晚宴，公開捐款三萬元畀民主黨，贊助該黨立法會前議員李華明唱歌事件，持續喺政界發酵，事隔一星期，林鄭趁尋日出席行政會議前為當日嘅做法解畫，首先對今次事件引起民主黨不便及建制派政黨不安，表示「唔好意思」。佢其後又聲稱，唔同政黨邀請佢出席晚宴都一定去，但鼓吹港獨嘅政黨係例外，加上同李華明認識超過二十年，對方稱《笑看風雲》一曲係唱畀佢聽，並希望籌款籌得「齊頭數」，死撐自己當晚捐款三萬元屬於人性化、友情行為。

對於個人Instagram帳戶上載當晚相片並形容為「大和解」，林鄭疑把責任推得一乾二淨，推說係特首辦內技術同事「自作主張」，對方已為此道歉，佢形容有關做法非常唔合適，因為自己同政黨根本冇乜大嘅仇恨，「唔需要去做大和解」。

林鄭又提及，若社會上認為特首需要謹慎一啲，唔好有咁多人性化表現，自己願意克制一啲，佢聲言，「我唔係某一個政黨推出來去管理香港，所以呢種對事唔對人，就係我嘅施政方針」。

隨時被加顛覆國家字眼

話時話，林鄭直接領導嘅特首辦，合共約一百人，林鄭若然咁都搞唔掂，隨時畀佢身邊嘅近身同事於官方網上平台擅自加料，真係匪夷所思，好似今次就話畀人於官方帳戶加咗「#大和解」，若然有人存心對着幹，只要喺大和解三個字前面加上一個「不」字，就已經將有關意思一百八十度反轉。

更進一步嚟講，一旦特首辦內有人「黃皮白心」，喺官方網上平台「玩嘢」加上支持港獨、顛覆國家等字句，再加上律政司屢次放生反中亂港分子嘅個案周而復始咁發生，凡此種種，都係正面觸碰國家原則底線嘅行為，到時林鄭冇可能再以有人「自作主張」做擋箭牌，佢將要為管理特首辦無方，用人失察一事付出沉重代價。

另外，港府近期施政立立亂亦波及林鄭民望。港大民意研究計劃於本月十五日至二十日以電話訪問約一千人，林鄭支持率為四成四，反對率為四成一，民望淨值為正三個百分點，呢個係林鄭上任特首以來新低。至於市民對財政預算案最新滿意情況，最新滿意率只有二成八，不滿意率有五成九，滿意度評分持續下跌至四十點九分，呢個係○八年相關調查問題開展以來新低。