中環出更：差餉寬免搞公聽會 象哥警告議員咪玩失蹤
差餉寬免幾乎係財政預算案嘅常設措施，今年建議每戶每季差餉寬免以二千五百元為上限，而有關建議尋日喺立法會《2018年差餉（豁免）令》小組委員會審議。咪以為差餉寬免無乜爭議，人民力量陳志全（慢必）就提出召開公聽會，而議會陣線朱凱廸亦支持。其實差餉寬免嘅修訂空間好細，唔知佢想開公聽搞邊科呢？
委員會主席黃定光（象哥）都話今次條例簡單，似乎冇乜搞公聽會嘅需要，仲提到以前搞公聽會，啲議員失晒蹤，佢就覺得好肉酸，反問慢必同朱凱廸係咪一定會出席公聽會先？
修訂空間細 議員倡設限
朱凱廸好爽快答應咗，但慢必就話如果撞咗其他會議，就好難全程都出席，點知象哥即刻就話：「你搞到得我自己一個坐喺度好難堪喎，你試下上嚟做主席吖！」不過象哥都話會約吓時間，照搞番場咁話。
雖然差餉寬免修改嘅空間好細，但唔少議員都提到要為差餉寬免設限，例如議員周浩鼎就話可以從限「一人一物業」獲寬免嘅角度出發。不過，當局就話現時係按物業徵收差餉，如果要設限，就要大幅更新政府資料，所以要從長計議。
卓妮