中環出更：婚姻裂痕如癌症 鄧子聰籲每年「體檢」
有人話「婚姻係愛情嘅墳墓」，但其實只要識得檢視感情狀況，要成就一段美滿嘅婚姻並非冇可能。國際青年商會香港總會（總會）剛就今年社會關心嘅議題策劃一連串活動，而旗下嘅分會、城市青年商會會長鄧子聰（Cyrus），就打算舉辦「婚姻體檢日」，畀每對夫婦正視彼此間嘅感情問題，繼而作出補救之道，佢話出現裂痕嘅婚姻就好似癌症咁，唔想惡化至末期無可救藥，就要及早察覺問題所在，病向淺中醫。
鄧子聰話正聯繫某幾間福利機構同大學，透過前線經驗同學術調查，制訂問卷嚟檢視婚姻狀況，只要據實回答各條問題，夫婦感情係好係壞就會從綜合分數中反映。佢建議除咗情人節同結婚紀念日之外，夫婦每年至少要有一日嚟檢驗婚姻狀況，並依問卷所得嘅分數，嚟判斷問題係屬初期抑或必須尋求輔導嘅階段。佢仲話唔好以為婚姻只係兩個人嘅事就掉以輕心，因為社會上有好多問題都係同婚姻失敗有關，要避免香港嘅離婚率日漸趨升，就要設法阻止婚姻癌症嘅蔓延。
總會可持續發展董事謝耀全就負責「淨氣香港」嘅項目，佢直指空氣污染嚴重，加上愈來愈細嘅居住空間，令香港喺世界宜居城市嘅排名不斷下跌，所以佢想透過舉辦主題演講，同全港中學生改善空氣質素方案設計比賽，為保護環境政策帶嚟新構思。
李海榮召義工執沙灘垃圾
籌委會主席李海榮則計劃喺今年九月組織二千名義工清理海灘垃圾，此舉除咗響應美國總會「世界清潔日」嘅呼籲，又圖創最多人同時清潔海岸線嘅世界紀錄。
總會會長簡汝謙就話企業亦要思考一下，點樣生產利潤之餘又唔會對環境構成損害，而在場嘅晉峰青年商會會長顧問梁嘉恩，總會執行副會長譚麗時同總會副會長陳立言都好認同。
卓妮