政情:肥尹殺入屯門 想為AV仁雪恥?

過往開議員地區辦事處少有大搞嘅民主黨(白鴿黨)議員尹兆堅(肥尹),尋日罕有地為佢喺屯門友愛邨嘅辦事處大搞開幕儀式,一問之下,原來係因為該黨前主席何俊仁(AV仁)已經冇做議員,令該黨交咗個辦事處出嚟,為咗通知市民佢哋重開,所以咪搞大啲囉!

話開辦事處方便工作

翻查資料,AV仁喺一五年嘅區議會選舉輸咗畀建制派嘅何君堯,連帶唔能夠競逐連任立法會超級區議會議席,唔通肥尹今次係有意鋪路想搶番個議席?肥尹就話唔係,話佢呢個係立法會議員辦事處,同AV仁嘅區議員辦事處唔同,今次純粹開番個辦事處方便工作啫,至於來年區議會選舉嘅情況實在言之尚早,都未知黨會點安排。

今次個辦事處開喺友愛邨,算係屯門嘅核心地帶,唔知對白鴿黨嘅選情會唔會有利?肥尹話抽中友愛邨係好運嘅,不過做嘢嚟講分別就唔大,主要係為班街坊方便啲咁話。

第一手消息請下載on.cc東網iPhone/iPad/Android/Windows Phone Apps