中環出更：新議員宣誓 胡杏兒姊與家人撐場
新當選四名議員尋日喺立法會大會中宣誓就職，新民主同盟范國威同民建聯鄭泳舜嘅親友均有現身撐場。其中鄭泳舜更全家總動員出席，包括佢父母、太太胡可兒，即藝人胡杏兒嘅姐姐，以及胡嘅父母等。
鄭泳舜嘅家人係最早到場，除咗父母，鄭泳舜嘅弟妹亦有出席，佢哋同胡可兒父母坐喺最前排，而鄭錦鐘夫婦就同胡可兒坐喺後一排，喺等待期間，胡可兒仲同老爺奶奶合照添！鄭泳舜就喺一眾民建聯嘅議員陪同下進入會議廳，佢喺會議廳內同其他議員握手及自拍，其後得悉家人喺公眾席，仲同佢哋揮手同互相拍照。
范國威太太做義工助丈夫
范國威嘅太太就同多名新同盟嘅成員進入公眾席，佢喺整個宣誓儀式完成後就離去，佢透露，自己會以義工形式協助丈夫。到咗中午，見到民主黨尹兆堅同范國威一齊去宴會廳食晏，仲互搭膊頭合照添！范國威笑稱，家人曾經住喺尹兆堅嘅選區內，咁啱兩人喺電梯相遇咪一齊食飯囉！問到係咪一齊食咖喱，別名「咖喱飯」嘅范國威話唔知，尹兆堅就話有時候會有嘅。
民主黨區諾軒同建築界議員謝偉銓尋日宣誓，唔見佢哋嘅家人到場。謝偉銓話女兒要返工，而太太就話喺屋企睇電視直播就得嘞！認真搞笑。佢又話由於年幾冇再踏足立法會，所以好多路都唔認得，連去宴會廳食晏都行錯路添！
另外，區諾軒尋晚喺政府提交臨時撥款議案中首次發言，竟舉出財政預算案中有關大專院校撥款，反被立法會主席梁君彥出言叫停，指佢離題。此外，立法會尋日發出文件，統計數字指最年輕嘅議員為三十一歲，即係計大咗區諾軒一歲喎，事關佢六月生日，秘書處回應話今個會期開始只要求議員提供出生年份，所以係根據出生年份計嘅。
卓妮