政情：有相為證：胡穗珊退出工黨掟煲唔掟蓋
工黨前主席胡穗珊早前因為不滿被黨友長期不公平對待，決定退黨死諫，又唔點名批評黨內有人喺處理事件上不合乎公義。佢尋日喺工黨搞嘅一個示威中現身，仲同該黨主席郭永健同副主席麥德正「行埋」，唔通已經入番工黨？原來唔係，胡穗珊表明短期內就唔會入番工黨啦！
暫唔打算入番黨
胡穗珊話已多次同工黨一齊示威請願o架啦，其實大家政見主張都接近，仲成日喺辦公室見到工黨嘅成員添！佢強調退黨嘅原因同工黨理念無關，而係黨內管理同紀律出現問題，依家自己喺一個叫社區前進嘅平台服務，關心基層等路線都同工黨接近，都好多合作。佢透露知道工黨內部正進行改革，但自己仍唔滿意，所以暫時唔打算加入番。